《小傳日記》道士股鼎益豐拗繁簡體不同,係真無辜定死雞撐飯蓋?

　　《小傳日記》被戲稱「道士股」嘅資深妖股鼎益豐(00612-HK),前排創辦人被深圳公安拉咗,原因係非法集資,公司市值一星期內無咗四成,但到咗今日鼎益豐股價就反彈逾兩成,不過考慮到股價足夠殘,升兩成都只係每股升咗2毫半啫,帳面一手賺200蚊,純屬死貓彈。

　　上星期深圳市公安局福田分局爆出個大新聞,話「鼎益丰」同佢啲關聯公司搞咗個虛假理財產品同「DDO數字期權」,屬於非法活動,已涉及犯罪。公安局仲提到高層隋某義、馬某秋等人因為涉嫌集資詐騙已經俾拉咗。大家都認為隋某義、馬某秋即為鼎益豐創始人兼前主席隋廣義同集團接任主席馬小秋。

　　不過鼎益豐日前發通告話,深圳公安通告中提到嘅「鼎益丰」,同「鼎益豐」唔係同一間公司,冇諗到繁簡體都可以拗,明明隋廣義仲有持有公司差唔多一成股份,咁樣割席會唔會隔硬咗啲?今日鼎益豐乘住消息夾咗上去,妖咗少少咁囉。

　　鼎益豐玩玄學投資好似好騎呢,但其實佢管理嘅產品規模曾經去到千億級別,唔少人嘅身家積蓄喺晒入面,無他嘅,佢標榜嘅產品收益真係夠晒癲,年化收益可以達到72%至100%!咁高嘅收益,佢哋點賺返嚟嘅呢?全靠隋廣義嗰套「禪易投資法」喎,隋廣義話佢係國學大師,用禪定同易理嚟搞投資,話預測精準度仲高過西方數學模型,講到好犀利咁,不過有心人發現,其實鼎益豐嘅玩法,主要都係控制一啲成交量低嘅港股公司,跟住搭棚炒高股價啫,當中無咩超自然力量。

　　雖然早年鼎益豐嘅兌付情況十分良好,但紙始終包唔住火,公司喺上年出現兌付問題,理財產品大面積逾期,最後全面爆雷。當時搞到好多投資者去鼎益豐辦公室嗌大交,鼎益豐居然搞咗個數字期權計劃,話要延緩兌付危機。然後又搞封閉措施,話2024年1月10號到9月10號期間,所有投資者都唔可以退出。

　　面對鼎益豐呢啲誠信破產嘅公司,唔好講長線投資,就連短炒都應該避之則吉。咁點樣可以睇穿呢類神棍?最簡單一個道理,一家投資有道、保證理財產品收益可以去到一倍嘅投資公司,自家上市公司就連年蝕錢,有無咁嘅道理?投資者信錯神棍,與其望天打卦,不如自我增值帶眼識人,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。