《小傳日記》Twitter財務漩渦未散,馬斯克仲有咩要煩?

　　《小傳日記》馬斯克呢排成為焦點,近期佢喺網上問網民係咪應該辭去推特(Twitter)負責人一職,又話佢會遵循民調結果。投票結束後顯示,1700多萬網民投票,近6成人認為佢應該辭職。不過,佢喺呢個投票無透露,如果網民贊成,佢會幾時提出請辭。

　　自從馬斯克處理收購Twitter嘅事以嚟,特斯拉(Tesla)股價不斷咁跌,年內已經暴跌超過60%。今個月中,佢再次出售手頭上超過30億美元嘅Tesla股份,部分原因係要填番Twitter資產負債表上嘅銀行貸款。佢年內至今沽咗近400億美元Tesla股份,持股比例降到13.4%左右。

　　Tesla市值跌到5000億美元以下,馬斯克嘅身家都跟住一齊跌,失去世界首富寶座。根據彭博億萬富翁指數,他嘅淨資產跌到1477億美元,係兩年幾以嚟最低水平。

　　馬斯克曾經喺4月話唔打算出售更多Tesla股票,但後嚟都係沽出數十億美元嘅股票,令佢失去股東嘅信任。投行分析師艾夫斯話,馬斯克將Tesla當係自己嘅提款機,繼續幫Twitter填氹,佢對Twitter嘅專注正損害Tesla品牌,Tesla董事會可能會介入。如果真係咁嘅話,馬斯克可以話送自己入掘頭路,到時佢仲有咩奇招拆局呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。